is jaur o jafa se tere zinhaar na TuTe

is jaur o jafā se tire zinhār na TuuTe

ye dil to kisī tarah se ai yaar na TuuTe

ġhairoñ ko na kar mujh dil-e-bismil ke muqābil

chau rañg lagāte tirī talvār na TuuTe

vo shīsha-e-dil hai ki isī sañg-e-jafā par

sau baar agar pheñkiye yak-bār na TuuTe

rakh qais qadam vādi-e-lailā meñ samajh kar

is dasht-e-mohabbat kā koī ḳhaar na TuuTe

jumbish meñ na lā sub.ha-e-islām ko ai sheḳh

nāzuk hai mirā rishta-e-zunnār na TuuTe

shāna se 'fuġhāñ' phir ulajhtā hai mirā dil

us kākul-e-mushkīñ kā koī taar na TuuTe

is jaur o jafa se tere zinhaar na TuTe

ye dil to kisi tarah se ai yar na TuTe

ghairon ko na kar mujh dil-e-bismil ke muqabil

chau rang lagate teri talwar na TuTe

wo shisha-e-dil hai ki isi sang-e-jafa par

sau bar agar phenkiye yak-bar na TuTe

rakh qais qadam wadi-e-laila mein samajh kar

is dasht-e-mohabbat ka koi KHar na TuTe

jumbish mein na la subha-e-islam ko ai sheKH

nazuk hai mera rishta-e-zunnar na TuTe

shana se 'fughan' phir ulajhta hai mera dil

us kakul-e-mushkin ka koi tar na TuTe