is ka nahin hai gham koi jaan se agar guzar gae

is kā nahīñ hai ġham koī jaañ se agar guzar ga.e

dikh kī añdherī qabar par ham bhī charāġh dhar ga.e

shān-o-shikoh kyā hue qaisar-o-jam kidhar ga.e

taḳht ulaT ulaT ga.e taaj bikhar bikhar ga.e

fikr-e-ma.āsh ne sabhī jazboñ ko sard kar diyā

saḌkoñ pe din guzar gayā ho ke niDhāl ghar ga.e

tundī-e-sail-e-vaqt meñ ye bhī hai koī zindagī

sub.h hui to jī uThe raat hui to mar ga.e

gard-e-safar meñ kho ga.e aise hazāroñ rāh-rau

raah meñ jo Thahar ga.e āñdhiyoñ se jo Dar ga.e

aap kā to maqām thā dil ke buland taḳht par

aap ko aaj kyā huā dil se mire utar ga.e

khil ke raheñge dekhnā chaar sū raushnī ke phuul

raat ke dasht kī taraf naqsh-gar-e-sahar ga.e

ḳhaak meñ terī mil ga.ī 'faiz' ke jism kī ziyā

ab to dayār-e-mahvashāñ! qarz tamām utar ga.e

is ka nahin hai gham koi jaan se agar guzar gae

dikh ki andheri qabar par hum bhi charagh dhar gae

shan-o-shikoh kya hue qaisar-o-jam kidhar gae

taKHt ulaT ulaT gae taj bikhar bikhar gae

fikr-e-maash ne sabhi jazbon ko sard kar diya

saDkon pe din guzar gaya ho ke niDhaal ghar gae

tundi-e-sail-e-waqt mein ye bhi hai koi zindagi

subh hui to ji uThe raat hui to mar gae

gard-e-safar mein kho gae aise hazaron rah-rau

rah mein jo Thahar gae aandhiyon se jo Dar gae

aap ka to maqam tha dil ke buland taKHt par

aap ko aaj kya hua dil se mere utar gae

khil ke rahenge dekhna chaar su raushni ke phul

raat ke dasht ki taraf naqsh-gar-e-sahar gae

KHak mein teri mil gai 'faiz' ke jism ki ziya

ab to dayar-e-mahwashan! qarz tamam utar gae