is ka to gham nahin dil-e-diwana jal gaya

is kā to ġham nahīñ dil-e-dīvāna jal gayā

zālim ye ġham hai terā sanam-ḳhāna jal gayā

bedād rashk se dil-e-dīvāna jal gayā

sad-haif ham na jal ga.e parvāna jal gayā

shāyad safā-e-husn meñ muzmar thiiñ ranjisheñ

āġhosh-e-iltifāt meñ parvāna jal gayā

saaqī kī chashm-e-nāz se nisbat hai kyā use

bas ik nigāh-e-garm meñ paimāna jal gayā

hangāma-e-hayāt huā ḳhatm us ke saath

ab koī kyā jiye dil-e-dīvāna jal gayā

ātish sarisht-e-sham.a hai yā hai itāb-e-husn

ham itnā jānte haiñ ki parvāna jal gayā

tere karam se dil pe jo guzrī vo kyā kaheñ

sahbā-e-ātishīñ se ye paimāna jal gayā

is ka to gham nahin dil-e-diwana jal gaya

zalim ye gham hai tera sanam-KHana jal gaya

bedad rashk se dil-e-diwana jal gaya

sad-haif hum na jal gae parwana jal gaya

shayad safa-e-husn mein muzmar thin ranjishen

aaghosh-e-iltifat mein parwana jal gaya

saqi ki chashm-e-naz se nisbat hai kya use

bas ek nigah-e-garm mein paimana jal gaya

hangama-e-hayat hua KHatm us ke sath

ab koi kya jiye dil-e-diwana jal gaya

aatish sarisht-e-shama hai ya hai itab-e-husn

hum itna jaante hain ki parwana jal gaya

tere karam se dil pe jo guzri wo kya kahen

sahba-e-atishin se ye paimana jal gaya