is kaDi dhup ke sannaTe mein hairan hua

is kaḌī dhuup ke sannāTe meñ hairān huā

ghar se jo bhī nikal aayā vo pashemān huā

hasrateñ ḳhaak uḌātī haiñ har ik qarye meñ

dil ki ik shahr-e-nigārāñ thā bayābān huā

muddateñ guzrīñ to ik qatra guhar ban paayā

sadiyāñ bītīñ to kahīñ aadmī insān huā

sar-e-sāhil the to ye sail-e-balā kuchh bhī na thā

zad meñ jab aa.e to andāza-e-tūfān huā

ham sar-e-tūr bhī pahuñche magar ai husn-e-azal

tere milne kā na phir bhī koī imkān huā

sar jhukā.e hue kyuuñ baiThe haiñ arbāb-e-vafā

marhala kaun sā mushkil thā jo āsān huā

na dar-o-bām pe raunaq na jharokoñ meñ bahār

dil-e-vīrāñ kī tarah shahr bhī sunsān huā

tū bhī is ġham-kada-e-dahr meñ aa kar 'mohsin'

bū-e-gul kī tarah āvāra-e-hairān huā

is kaDi dhup ke sannaTe mein hairan hua

ghar se jo bhi nikal aaya wo pasheman hua

hasraten KHak uDati hain har ek qarye mein

dil ki ek shahr-e-nigaran tha bayaban hua

muddaten guzrin to ek qatra guhar ban paya

sadiyan bitin to kahin aadmi insan hua

sar-e-sahil the to ye sail-e-bala kuchh bhi na tha

zad mein jab aae to andaza-e-tufan hua

hum sar-e-tur bhi pahunche magar ai husn-e-azal

tere milne ka na phir bhi koi imkan hua

sar jhukae hue kyun baiThe hain arbab-e-wafa

marhala kaun sa mushkil tha jo aasan hua

na dar-o-baam pe raunaq na jharokon mein bahaar

dil-e-viran ki tarah shahr bhi sunsan hua

tu bhi is gham-kada-e-dahr mein aa kar 'mohsin'

bu-e-gul ki tarah aawara-e-hairan hua