اس کڑی دھوپ سے بچنا ہے تو سایہ ڈھونڈو

اس کڑی دھوپ سے بچنا ہے تو سایہ ڈھونڈو

در و دیوار کی بانہوں کا سہارا ڈھونڈو

دم ہی گھٹ جائے نہ اک روز فصیل غم میں

ہاتھ پر ہاتھ دھرے بیٹھے ہو رستہ ڈھونڈو

جب سکت تم میں نہیں موجوں سے ٹکرانے کی

یہی بہتر ہے کہ دریا کا کنارا ڈھونڈو

ناگ تنہائی کے خوں چاٹتے ہوں گے شب میں

شہر میں شام ہی سے کوئی شناسا ڈھونڈو

شادمانی ہو جہاں نور و تجلی ہو جہاں

اب کوئی ایسی ہی اپنے لیے دنیا ڈھونڈو

جگمگاتے ہوئے چہروں پہ نہ جاؤ لوگو

کون کیا ہے یہ حقیقت پس پردہ ڈھونڈو