is ke ghar se mere ghar tak ek kahani bich mein hai

is ke ghar se mere ghar tak ek kahānī biich meñ hai

merī us kī rāhguzar tak ek kahānī biich meñ hai

chappa chappa us kī galī kā rahā hai mere zer-e-qadam

josh-e-junūñ se azm-e-safar tak ek kahānī biich meñ hai

zulf-o-lab-o-ruḳhsār kisī kā hai merā mauzū-e-suḳhan

tārīkī se nūr-e-nazar tak ek kahānī biich meñ hai

ḳhūn-e-jigar shāmil hai merā is gulzār kī raunaq meñ

sehn-e-chaman se barg o shajar tak ek kahānī biich meñ hai

kaun-o-makāñ kī har shai meñ haiñ fitrat ke asrār-o-rumūz

bahr-o-bar se shams-o-qamar tak ek kahānī biich meñ hai

maal bhī aksar ho jaatā hai jaan kā logoñ kī janjāl

batn-e-sadaf se la.al-o-gohar tak ek kahānī biich meñ hai

zid na karo tum sun na sakoge 'barqī' kā ye soz-e-darūñ

tīr-e-nazar se zaḳhm-e-jigar tak ek kahānī biich meñ hai

is ke ghar se mere ghar tak ek kahani bich mein hai

meri us ki rahguzar tak ek kahani bich mein hai

chappa chappa us ki gali ka raha hai mere zer-e-qadam

josh-e-junun se azm-e-safar tak ek kahani bich mein hai

zulf-o-lab-o-ruKHsar kisi ka hai mera mauzu-e-suKHan

tariki se nur-e-nazar tak ek kahani bich mein hai

KHun-e-jigar shamil hai mera is gulzar ki raunaq mein

sehn-e-chaman se barg o shajar tak ek kahani bich mein hai

kaun-o-makan ki har shai mein hain fitrat ke asrar-o-rumuz

bahr-o-bar se shams-o-qamar tak ek kahani bich mein hai

mal bhi aksar ho jata hai jaan ka logon ki janjal

batn-e-sadaf se lal-o-gohar tak ek kahani bich mein hai

zid na karo tum sun na sakoge 'barqi' ka ye soz-e-darun

tir-e-nazar se zaKHm-e-jigar tak ek kahani bich mein hai