is KHak-dan mein humse samaya na jaega

is ḳhāk-dāñ meñ ham se samāyā na jā.egā

apnī ḳhudī ko itnā ghaTāyā na jā.egā

suqrāt-vār haq kī himāyat karegā jo

kyoñ jām-e-zahr us ko pilāyā na jā.egā

us nāznīñ se baar hai jis par nigāh-e-mehr

bār-e-vafā-e-ahd uThāyā na jā.egā

is qahrmāñ se jis kī hai pāmāl ek ḳhalq

qasr-e-amal kisī kā girāyā na jā.egā

vo chashm-e-nīm-ḳhvāb ki hai hashr dar jilau

fitna uThā ga.ī to biThāyā na jā.egā

nāseh ye kyā kahā ki agar mar miTā kahīñ

tā-hashr phir se tujh ko jalāyā na jā.egā

ham vo nahīñ ki kohkan-o-qais kī tarah

ham se ye bār-e-shauq uThāyā na jā.egā

albatta dil se Dar hai ki laave na ġham kī taab

so us ko bhī ye raaz batāyā na jā.egā

'arshī' ham us kī baat pe kahte haiñ yuuñ bajā

rūThā to phir vo ham se manāyā na jā.egā

is KHak-dan mein hum se samaya na jaega

apni KHudi ko itna ghaTaya na jaega

suqraat-war haq ki himayat karega jo

kyon jam-e-zahr us ko pilaya na jaega

us naznin se bar hai jis par nigah-e-mehr

bar-e-wafa-e-ahd uThaya na jaega

is qahrman se jis ki hai pamal ek KHalq

qasr-e-amal kisi ka giraya na jaega

wo chashm-e-nim-KHwab ki hai hashr dar jilau

fitna uTha gai to biThaya na jaega

naseh ye kya kaha ki agar mar miTa kahin

ta-hashr phir se tujh ko jalaya na jaega

hum wo nahin ki kohkan-o-qais ki tarah

hum se ye bar-e-shauq uThaya na jaega

albatta dil se Dar hai ki lawe na gham ki tab

so us ko bhi ye raaz bataya na jaega

'arshi' hum us ki baat pe kahte hain yun baja

ruTha to phir wo hum se manaya na jaega