اس خاک داں میں ہم سے سمایا نہ جائے گا

اس خاک داں میں ہم سے سمایا نہ جائے گا

اپنی خودی کو اتنا گھٹایا نہ جائے گا

سقراط وار حق کی حمایت کرے گا جو

کیوں جام زہر اس کو پلایا نہ جائے گا

اس نازنیں سے بار ہے جس پر نگاہ مہر

بار وفا عہد اٹھایا نہ جائے گا

اس قہرماں سے جس کی ہے پامال ایک خلق

قصر امل کسی کا گرایا نہ جائے گا

وہ چشم نیم خواب کہ ہے حشر در جلو

فتنہ اٹھا گئی تو بٹھایا نہ جائے گا

ناصح یہ کیا کہا کہ اگر مر مٹا کہیں

تا حشر پھر سے تجھ کو جلایا نہ جائے گا

ہم وہ نہیں کہ کوہ کن و قیس کی طرح

ہم سے یہ بار شوق اٹھایا نہ جائے گا

البتہ دل سے ڈر ہے کہ لاوے نہ غم کی تاب

سو اس کو بھی یہ راز بتایا نہ جائے گا

عرشیؔ ہم اس کی بات پہ کہتے ہیں یوں بجا

روٹھا تو پھر وہ ہم سے منایا نہ جائے گا