is KHizan ki rut mein apna sath achchha rah gaya

is ḳhizāñ kī rut meñ apnā saath achchhā rah gayā

sab parā.e ho ga.e ik maiñ hī apnā rah gayā

zindagī hamvār thī to saath thā amboh ek

zindagī ke moḌ par pahuñchā to tanhā rah gayā

kal sajā thā jin ke chehroñ par mohabbat kā naqāb

kitnī hairat se unheñ maiñ aaj taktā rah gayā

ek saaya thā chalā sub.h-e-azal mujh se tavīl

āfatoñ kā āftāb aayā to chhoTā rah gayā

vo zamāna thā kabhī ki thā hujūm ik sub.h o shaam

yaad thā sab kuchh hameñ bas yaad itnā rah gayā

jo kisī ke jism kā kal tak rahā thā ik libās

ab alaihada yuuñ huā ki koī nañgā rah gayā

har hasīñ chehre pe jam kar rah ga.ī mausam kī gard

har hasīñ chehra mire album kā dhuñdlā rah gayā

maiñ bhalā kaise karūñ pābandi-e-ahl-e-fareb

maslahat meñ Duub kar kaise vo sachchā rah gayā

jab huī hai ġham kī yūrish har taraf se be-hisāb

maiñ ne ḳhushiyāñ baañT diiñ aur ḳhud nihattā rah gayā

har koī tark-e-ta'alluq par musir hai ab 'ḳhayāl'

aa mire dil tū bhī aa jā kis kā dhaḌkā rah gayā

is KHizan ki rut mein apna sath achchha rah gaya

sab parae ho gae ek main hi apna rah gaya

zindagi hamwar thi to sath tha amboh ek

zindagi ke moD par pahuncha to tanha rah gaya

kal saja tha jin ke chehron par mohabbat ka naqab

kitni hairat se unhen main aaj takta rah gaya

ek saya tha chala subh-e-azal mujh se tawil

aafaton ka aaftab aaya to chhoTa rah gaya

wo zamana tha kabhi ki tha hujum ek subh o sham

yaad tha sab kuchh hamein bas yaad itna rah gaya

jo kisi ke jism ka kal tak raha tha ek libas

ab alaihada yun hua ki koi nanga rah gaya

har hasin chehre pe jam kar rah gai mausam ki gard

har hasin chehra mere album ka dhundla rah gaya

main bhala kaise karun pabandi-e-ahl-e-fareb

maslahat mein Dub kar kaise wo sachcha rah gaya

jab hui hai gham ki yurish har taraf se be-hisab

main ne KHushiyan banT din aur KHud nihatta rah gaya

har koi tark-e-ta'alluq par musir hai ab 'KHayal'

aa mere dil tu bhi aa ja kis ka dhaDka rah gaya