isko kuchh to milta hai mujh pe zulm Dhane se

is ko kuchh to miltā hai mujh pe zulm Dhāne se

ba.az vo na aa.egā merā ghar jalāne se

gā rahī haiñ dīvāreñ raqs meñ hai āñgan bhī

kitnī raunaqeñ aa.iiñ tere luuT aane se

aa ki tere māthe par ab ise sajā duuñ maiñ

chāñd le ke aayā huuñ raat ke ḳhazāne se

vo bhī in dinoñ yaaro apnī chaal meñ gum hai

ham bhī kuchh nahīñ kahte aaj kal zamāne se

ham ne apnī āñkhoñ meñ ḳhvāb kuchh sajā.e haiñ

apnā bhī ta.alluq hai ziist ke gharāne se

vo hai be-nazar 'pāshī' us ko kyā ḳhabar 'pāshī'

kitne dil sulagte haiñ ik diyā bujhāne se

is ko kuchh to milta hai mujh pe zulm Dhane se

baz wo na aaega mera ghar jalane se

ga rahi hain diwaren raqs mein hai aangan bhi

kitni raunaqen aain tere luT aane se

aa ki tere mathe par ab ise saja dun main

chand le ke aaya hun raat ke KHazane se

wo bhi in dinon yaro apni chaal mein gum hai

hum bhi kuchh nahin kahte aaj kal zamane se

hum ne apni aankhon mein KHwab kuchh sajae hain

apna bhi talluq hai zist ke gharane se

wo hai be-nazar 'pashi' us ko kya KHabar 'pashi'

kitne dil sulagte hain ek diya bujhane se