اس کنبہ پرور دنیا میں بیکس کی حمایت کون کرے

اس کنبہ پرور دنیا میں بیکس کی حمایت کون کرے

جب غاصب منصف بن جائیں انصاف کی زحمت کون کرے

جو فرق سمجھتے ہیں اب تک ہندی سندھی پنجابی میں

ان عقل کے پورے لوگوں سے لڑنے کی حماقت کون کرے

جو لٹ کر آئے ہیں ان کو صبر آتے آتے آئے گا

لیکن اس بے حس دنیا میں احساس حقیقت کون کرے

کیا رہنا ایسی بستی میں ہر بات جہاں کی الٹی ہو

جب باڑ ہی کھیت کی دشمن ہو پھر اس کی حفاظت کون کرے

معلوم یہ ہوتا ہے اب تک یوسف کے برادر زندہ ہیں

جب اپنے دشمن ہو جائیں غیروں کی شکایت کون کرے

ان کھاتے پیتے لوگوں سے یہ بات کوئی پوچھے جا کر

زرداروں کی دعوت تم نے کی نادار کی دعوت کون کرے

محلوں کے سنہری پردوں میں ہر عیب ہنر بن جاتا ہے

لیکن ان دولت مندوں کو جھٹلانے کی جرأت کون کرے

ہم سب کچھ کر سکتے ہیں مگر یہ سوچ کے پھر رہ جاتے ہیں

تم لاکھ برے ہو اپنے ہو اپنوں سے بغاوت کون کرے