اس لطافت سے نوا پرداز ہونا چاہئے

اس لطافت سے نوا پرداز ہونا چاہئے

سوز کے پردے میں پنہاں ساز ہونا چاہئے

یوں تخیل کو فلک پرواز ہونا چاہئے

باریاب جلوہ گاہ ناز ہونا چاہئے

چھا رہا ہے بزم عالم پر سکوت ناروا

اک اشارہ اے نگاہ ناز ہونا چاہئے

اس طرح کہئے فسانہ ربط حسن و عشق کا

ہر نفس سرمایہ دار راز ہونا چاہئے

آج آتا ہے زباں پر قصۂ مہر و وفا

اہل دل کو گوش بر آواز ہونا چاہئے

حسن کافر ساز ہے غارت گر دنیا و دیں

عشق حق آگاہ کو دم ساز ہونا چاہئے

لائق صد ناز ہے نیرؔ نیاز عاشقی

اپنی قسمت پر مجھے بھی ناز ہونا چاہئے