is liye jafaon par mujhko muskurana tha

is liye jafāoñ par mujh ko muskurānā thā

aur us sitam-gar kā hausla baḌhānā thā

āñsuoñ kī qīmat jab motiyoñ se baḌh kar thī

vo mirī mohabbat kā aur hī zamānā thā

jab sitam se Darte the ab karam se Darte haiñ

ye bhī ik zamāna hai vo bhī ik zamānā thā

zindagī ne luuTā hai zindagī ko dānista

maut se shikāyat kyā maut kā bahānā thā

vo bhī daur guzrā hai jab mirī vafāoñ se

aap hī nahīñ tanhā bad-gumāñ zamānā thā

ai 'nasīm' gulshan meñ jab bahār ke din the

dosh par fazāoñ ke merā āshiyānā thā

is liye jafaon par mujh ko muskurana tha

aur us sitam-gar ka hausla baDhana tha

aansuon ki qimat jab motiyon se baDh kar thi

wo meri mohabbat ka aur hi zamana tha

jab sitam se Darte the ab karam se Darte hain

ye bhi ek zamana hai wo bhi ek zamana tha

zindagi ne luTa hai zindagi ko danista

maut se shikayat kya maut ka bahana tha

wo bhi daur guzra hai jab meri wafaon se

aap hi nahin tanha bad-guman zamana tha

ai 'nasim' gulshan mein jab bahaar ke din the

dosh par fazaon ke mera aashiyana tha