is liye milta hai wo mah-e-laqa tisre din

is liye miltā hai vo māh-e-laqā tīsre din

ruḳh badaltī hai zamāne kī havā tīsre din

nusḳhe par nusḳhe badal kar mujhe kahte haiñ tabīb

apnī tāsīr dikhātī hai davā tīsre din

baad do roz ke hai apnā lahū mujh ko mubāh

fāqa-kash ko huā murdār ravā tīsre din

āḳhirash roz hai kyoñ marg-e-adū kā mātam

sog ko dete haiñ duniyā meñ baḌhā tīsre din

ai ġham-e-yār mire dil meñ Thikānā kab tak

sāhab-e-ḳhāna ko mehmāñ hai balā tīsre din

jang ke baad agar sulh na ho sad-afsos

chāhiye qalb-e-mukaddar ho safā tīsre din

rahī har lahza hamārī tap-e-ġham meñ shiddat

zor har ek maraz kā hai ghaTā tīsre din

dast-o-pā surḳh kiyā kījiye mere ḳhuun se

uḌne lagtā hai sadā rang sadā tīsre din

ishq kā jin hī na lekin mire sar se utrā

roz chāTā kabhī ta.avīz piyā tīsre din

lillāh al-hamd vo aaya hai so.em meñ mere

mere mātam meñ vo shāmil to huā tīsre din

'sabr' hangām-e-talab shart hai niyyat meñ ḳhulūs

jā.egī bāb-e-ijābat pe duā tīsre din

is liye milta hai wo mah-e-laqa tisre din

ruKH badalti hai zamane ki hawa tisre din

nusKHe par nusKHe badal kar mujhe kahte hain tabib

apni tasir dikhati hai dawa tisre din

baad do roz ke hai apna lahu mujh ko mubah

faqa-kash ko hua murdar rawa tisre din

aaKHirash roz hai kyon marg-e-adu ka matam

sog ko dete hain duniya mein baDha tisre din

ai gham-e-yar mere dil mein Thikana kab tak

sahab-e-KHana ko mehman hai bala tisre din

jang ke baad agar sulh na ho sad-afsos

chahiye qalb-e-mukaddar ho safa tisre din

rahi har lahza hamari tap-e-gham mein shiddat

zor har ek maraz ka hai ghaTa tisre din

dast-o-pa surKH kiya kijiye mere KHun se

uDne lagta hai sada rang sada tisre din

ishq ka jin hi na lekin mere sar se utra

roz chaTa kabhi tawiz piya tisre din

lillah al-hamd wo aaya hai soem mein mere

mere matam mein wo shamil to hua tisre din

'sabr' hangam-e-talab shart hai niyyat mein KHulus

jaegi bab-e-ijabat pe dua tisre din