is marg ko kab nahin main samjha

is marg ko kab nahīñ maiñ samjhā

har dam dam-e-vāpsīñ maiñ samjhā

andāz tirā bas ab na kar shor

ai nāla-e-ātishīñ maiñ samjhā

tab mujh ko ajal huī gavārā

jab zahr ko añgbīñ maiñ samjhā

ik ḳhalq kī sarnavisht bāñchī

apnā na ḳhat-e-jabīñ maiñ samjhā

juuñ shāna kabhū tah-e-peñch tere

ai kākul-e-ambarīñ maiñ samjhā

kyā fā.eda āh-e-dam-ba-dam se

hai dard-e-dil-e-hazīñ maiñ samjhā

phir is meñ na shak ne raah paa.ī

jis baat ko bil-yaqīñ maiñ samjhā

jab uTh ga.ī zid to har suḳhan meñ

samjhā to kahīñ kahīñ maiñ samjhā

mū-e-kamar us kā kyā hai ai aql

samjhā tū mujhe nahīñ maiñ samjhā

likkhī ġhazal is meñ 'mus.hafī' jald

jis ko ki na.ī zamīñ maiñ samjhā

is marg ko kab nahin main samjha

har dam dam-e-wapsin main samjha

andaz tera bas ab na kar shor

ai nala-e-atishin main samjha

tab mujh ko ajal hui gawara

jab zahr ko angbin main samjha

ek KHalq ki sarnawisht banchi

apna na KHat-e-jabin main samjha

jun shana kabhu tah-e-pench tere

ai kakul-e-ambarin main samjha

kya faeda aah-e-dam-ba-dam se

hai dard-e-dil-e-hazin main samjha

phir is mein na shak ne rah pai

jis baat ko bil-yaqin main samjha

jab uTh gai zid to har suKHan mein

samjha to kahin kahin main samjha

mu-e-kamar us ka kya hai ai aql

samjha tu mujhe nahin main samjha

likkhi ghazal is mein 'mushafi' jald

jis ko ki nai zamin main samjha