is mein kya shak hai ki aawara hun main

is meñ kyā shak hai ki āvāra huuñ maiñ

kūche kūche meñ phirā kartā huuñ maiñ

mujh se sarzad hote rahte haiñ gunāh

aadmī huuñ kyuuñ kahūñ achchhā huuñ maiñ

sāf-o-shaffāf āsmāñ ko dekh kar

gandī gandī gāliyāñ baktā huuñ maiñ

qahva-ḳhānoñ meñ basar kartā huuñ din

qahba-ḳhānoñ meñ sahar kartā huuñ maiñ

din guzartā hai mirā ahbāb meñ

raat ko fōtpath par sotā huuñ maiñ

biiT kar jaatī hai chiḌiyā TaañT par

azmat-e-ādam kā ā.īna huuñ maiñ

kāñch sī guḌiyoñ ke narm a.asāb par

sūrat-e-sañg-e-havas paḌtā huuñ maiñ

nāzukoñ ke naaz uThāne ke bajā.e

nāzukoñ se naaz uThvātā huuñ maiñ

dūsroñ ko kyā patā apnā batā.ūñ

ab to ḳhud apne liye anqā huuñ maiñ

mujh se pūchhe hurmat-e-ka.aba koī

masjidoñ meñ choriyāñ kartā huuñ maiñ

mujh se likhvā.e koī hijv-e-sharāb

mai-kadoñ meñ qarz kī piitā huuñ maiñ

maiñ chhupātā huuñ barahna ḳhvāhisheñ

vo samajhtī hai ki sharmīlā huuñ maiñ

kis qadar bad-nāmiyāñ haiñ mere saath

kyā batā.ūñ kis qadar tanhā huuñ maiñ

ḳhvāb-āvar goliyoñ se ai 'shu.ūr'

ḳhud-kushī kī koshisheñ kartā huuñ maiñ

is mein kya shak hai ki aawara hun main

kuche kuche mein phira karta hun main

mujh se sarzad hote rahte hain gunah

aadmi hun kyun kahun achchha hun main

saf-o-shaffaf aasman ko dekh kar

gandi gandi galiyan bakta hun main

qahwa-KHanon mein basar karta hun din

qahba-KHanon mein sahar karta hun main

din guzarta hai mera ahbab mein

raat ko footpath par sota hun main

biT kar jati hai chiDiya TanT par

azmat-e-adam ka aaina hun main

kanch si guDiyon ke narm aasab par

surat-e-sang-e-hawas paDta hun main

nazukon ke naz uThane ke bajae

nazukon se naz uThwata hun main

dusron ko kya pata apna bataun

ab to KHud apne liye anqa hun main

mujh se puchhe hurmat-e-kaba koi

masjidon mein choriyan karta hun main

mujh se likhwae koi hijw-e-sharab

mai-kadon mein qarz ki pita hun main

main chhupata hun barahna KHwahishen

wo samajhti hai ki sharmila hun main

kis qadar bad-namiyan hain mere sath

kya bataun kis qadar tanha hun main

KHwab-awar goliyon se ai 'shuur'

KHud-kushi ki koshishen karta hun main