usne dil se nikal rakkha hai

us ne dil se nikāl rakkhā hai

kis musībat meñ Daal rakkhā hai

ġhaur se dekh us kī āñkhoñ meñ

raushnī kā kamāl rakkhā hai

us se hotī nahīñ mulāqāteñ

us ne va.adoñ pe Taal rakkhā hai

mere āñgan meñ kyā ḳhushī aa.e

sāmne ġham kā jaal rakkhā hai

vo hameñ pūchhne nahīñ aatā

ham ne jis ko sambhāl rakkhā hai

us kī ham is adā pe haiñ qurbān

rābta to bahāl rakkhā hai

ye kisī taur khul nahīñ paatā

kis ne kis kā ḳhayāl rakkhā hai

is kudūrat se mujh ko miltā hai

jaise shīshe meñ baal rakkhā hai

jis kā apnā nahīñ javāb koī

us ke aage savāl rakkhā hai

ai 'payām' us kī bhī ḳhabar le lo

kar ke jis ne niDhāl rakkhā hai

us ne dil se nikal rakkha hai

kis musibat mein Dal rakkha hai

ghaur se dekh us ki aankhon mein

raushni ka kamal rakkha hai

us se hoti nahin mulaqaten

us ne wadon pe Tal rakkha hai

mere aangan mein kya KHushi aae

samne gham ka jal rakkha hai

wo hamein puchhne nahin aata

hum ne jis ko sambhaal rakkha hai

us ki hum is ada pe hain qurban

rabta to bahaal rakkha hai

ye kisi taur khul nahin pata

kis ne kis ka KHayal rakkha hai

is kudurat se mujh ko milta hai

jaise shishe mein baal rakkha hai

jis ka apna nahin jawab koi

us ke aage sawal rakkha hai

ai 'payam' us ki bhi KHabar le lo

kar ke jis ne niDhaal rakkha hai