is qadar dur samajhne lage wo dil se mujhe

is qadar duur samajhne lage vo dil se mujhe

maut kyā niiñd bhī ab aa.egī mushkil se mujhe

dī hayāt-e-abadī us ne gale se mil kar

mil ga.ī dād-e-vafā ḳhanjar-e-qātil se mujhe

de chuke ġhair ko dil un se kuchh ummīd nahīñ

apne pahlū meñ jagah deñge vo kis dil se mujhe

dil-e-betāb sañbhāle se sañbhaltā hī nahīñ

ye nikalvā ke rahegā tirī mahfil se mujhe

le ga.e aaj ye kah kar vo mire pahlū se

hai mohabbat bahut armān-bhare dil se mujhe

shikve kartā huuñ taġhāful ke to kahtā hai koī

baat hī kyā hai bhulā dījiye ab dil se mujhe

is tarah fikr-e-suḳhan ne mujhe khoyā 'safdar'

maut bhī DhūñDhe to ab pā.egī mushkil se mujhe

is qadar dur samajhne lage wo dil se mujhe

maut kya nind bhi ab aaegi mushkil se mujhe

di hayat-e-abadi us ne gale se mil kar

mil gai dad-e-wafa KHanjar-e-qatil se mujhe

de chuke ghair ko dil un se kuchh ummid nahin

apne pahlu mein jagah denge wo kis dil se mujhe

dil-e-betab sanbhaale se sanbhalta hi nahin

ye nikalwa ke rahega teri mahfil se mujhe

le gae aaj ye kah kar wo mere pahlu se

hai mohabbat bahut arman-bhare dil se mujhe

shikwe karta hun taghaful ke to kahta hai koi

baat hi kya hai bhula dijiye ab dil se mujhe

is tarah fikr-e-suKHan ne mujhe khoya 'safdar'

maut bhi DhunDhe to ab paegi mushkil se mujhe