is qadar hum na-tawan-o-zar hain

is qadar ham nā-tavān-o-zār haiñ

baazū apne machhliyoñ ke ḳhaar haiñ

chaak chaak apnā garebāñ ho chukā

in dinoñ dast-e-junūñ bekār haiñ

rote haiñ ashkoñ ke badle ḳhuun gar

abr haiñ ham lekin ātish-bār haiñ

jaate haiñ gulshan se le o bāġhbāñ

ham agar terī nazar meñ ḳhaar haiñ

āstīñ se pochhiye kaahe ko ashk

ab to muñh par zaḳhm dāmn-dār haiñ

dekh kar tujh ko magar hairāñ hue

aa.ine jo pusht-bar-dīvār haiñ

le uḌ ai vahshat ki apnī paañv ke

muntazir ḳhār-e-sar-e-dīvār haiñ

āñkheñ haiñ ḳhuñḳhār terī ai masīh

kyā hai be-parhez ye bīmār haiñ

ḳhud-baḳhud apnā janāza hai ravāñ

ham ye kis ke kushta-e-raftār haiñ

sāya-e-ḳhanjar meñ aayā ḳhvāb-e-marg

vaah kyā tāle.a mire bedār haiñ

ham haiñ ranjūr apne ashk-o-āh se

hai burī āb-o-havā bīmār haiñ

ab to hai meñh kā barasnā apne haath

āstīneñ abr-e-dariyā-bār haiñ

sarv-o-shamsād-o-sanobar baaġh meñ

naqsha-hā-e-qāmat-e-dildār haiñ

kaun hai bezār in rozoñ 'vazīr'

ham jo apne ziist se bezār haiñ

is qadar hum na-tawan-o-zar hain

bazu apne machhliyon ke KHar hain

chaak chaak apna gareban ho chuka

in dinon dast-e-junun bekar hain

rote hain ashkon ke badle KHun gar

abr hain hum lekin aatish-bar hain

jate hain gulshan se le o baghban

hum agar teri nazar mein KHar hain

aastin se pochhiye kahe ko ashk

ab to munh par zaKHm damn-dar hain

dekh kar tujh ko magar hairan hue

aaine jo pusht-bar-diwar hain

le uD ai wahshat ki apni panw ke

muntazir KHar-e-sar-e-diwar hain

aankhen hain KHunKHar teri ai masih

kya hai be-parhez ye bimar hain

KHud-baKHud apna janaza hai rawan

hum ye kis ke kushta-e-raftar hain

saya-e-KHanjar mein aaya KHwab-e-marg

wah kya talea mere bedar hain

hum hain ranjur apne ashk-o-ah se

hai buri aab-o-hawa bimar hain

ab to hai meinh ka barasna apne hath

aastinen abr-e-dariya-bar hain

sarw-o-shamsad-o-sanobar bagh mein

naqsha-ha-e-qamat-e-dildar hain

kaun hai bezar in rozon 'wazir'

hum jo apne zist se bezar hain