is qadar naz hai kyun aapko yaktai ka

is qadar naaz hai kyuuñ aap ko yaktā.ī kā

dūsrā naam hai vo bhī mirī tanhā.ī kā

kyā chhupe raaz ilāhī dil-e-shaidā.ī kā

arsa-e-hashr to bāzār hai rusvā.ī kā

jaan le jā.egā aanā shab-e-tanhā.ī kā

kaun ab rokne vaalā hai mirī aa.ī kā

ḳhūgar-e-ranj-o-balā hashr ke din kyā ḳhush hoñ

ki vo maal aaj huā hai shab-e-tanhā.ī kā

zinda hai naam shahādat kā usī ke dam se

tere kushte ne kiyā kaam masīhā.ī kā

har galī kūche meñ pāmāl use ho jaanā

dil hai yā naqsh-e-qadam hai kisī harjā.ī kā

is adab se tah-e-shamshīr taḌapnā ai dil

ki gumāñ terī tapish par ho shakebā.ī kā

fitne bhī qā.ede se uThte haiñ jab uThte haiñ

kyā salīqa hai tumheñ anjuman-ārā.ī kā

vo ye kahte haiñ mirā sabr paḌegā tujh par

ab mujhe ranj nahīñ apnī shakebā.ī kā

kyā ġharaz hai mirī taqdīr ko mujh se pūchhe

aabrū kā hai talabgār ki rusvā.ī kā

vaañ shab-e-va.ada malī paañv meñ mehñdī us ne

yaañ kalejā koī maltā hai tamannā.ī kā

raat bhar sham.a rahī hijr meñ vo bhī ḳhāmosh

multajī thā tirī tasvīr se goyā.ī kā

sar mirā kaaT ke dahlīz par apnī rakh do

shauq baaqī hai abhī nāsiya-farsā.ī kā

yuuñ na maqbūl huā hogā kisī kā sajda

but ko armān rahā merī jabīñ-sā.ī kā

ho gayā partav-e-ruḳhsār se kuchh aur hī rañg

maiñ ne muñh chuum liyā us ke tamāshā.ī kā

tham ga.e jam ga.e āñkhoñ meñ lahū ke qatre

ḳhuun zāhir hai mire sabr o shakebā.ī kā

ban gayā dāġh-e-jigar mehr-e-qayāmat ai 'dāġh'

par abhī rañg vahī hai shab-e-tanhā.ī kā

is qadar naz hai kyun aap ko yaktai ka

dusra nam hai wo bhi meri tanhai ka

kya chhupe raaz ilahi dil-e-shaidai ka

arsa-e-hashr to bazar hai ruswai ka

jaan le jaega aana shab-e-tanhai ka

kaun ab rokne wala hai meri aai ka

KHugar-e-ranj-o-bala hashr ke din kya KHush hon

ki wo mal aaj hua hai shab-e-tanhai ka

zinda hai nam shahadat ka usi ke dam se

tere kushte ne kiya kaam masihai ka

har gali kuche mein pamal use ho jaana

dil hai ya naqsh-e-qadam hai kisi harjai ka

is adab se tah-e-shamshir taDapna ai dil

ki guman teri tapish par ho shakebai ka

fitne bhi qaede se uThte hain jab uThte hain

kya saliqa hai tumhein anjuman-arai ka

wo ye kahte hain mera sabr paDega tujh par

ab mujhe ranj nahin apni shakebai ka

kya gharaz hai meri taqdir ko mujh se puchhe

aabru ka hai talabgar ki ruswai ka

wan shab-e-wada mali panw mein mehndi us ne

yan kaleja koi malta hai tamannai ka

raat bhar shama rahi hijr mein wo bhi KHamosh

multaji tha teri taswir se goyai ka

sar mera kaT ke dahliz par apni rakh do

shauq baqi hai abhi nasiya-farsai ka

yun na maqbul hua hoga kisi ka sajda

but ko arman raha meri jabin-sai ka

ho gaya partaw-e-ruKHsar se kuchh aur hi rang

main ne munh chum liya us ke tamashai ka

tham gae jam gae aankhon mein lahu ke qatre

KHun zahir hai mere sabr o shakebai ka

ban gaya dagh-e-jigar mehr-e-qayamat ai 'dagh'

par abhi rang wahi hai shab-e-tanhai ka