is qadar sachchai se bezar duniya ho gai

is qadar sachchā.ī se bezār duniyā ho ga.ī

zad pe gardan hai mirī, talvār duniyā ho ga.ī

us ke dil meñ niim golī, shahd bātoñ meñ rakhe

pūchhte kyā ho miyāñ! makkār duniyā ho ga.ī

be-hayā.ī bevafā.ī be-yaqīnī be-hisī

kaise kaise ḳhanjaroñ kī dhaar duniyā ho ga.ī

maslahat ne kis qadar tabdīl us ko kar diyā

ġhair maiñ huuñ in dinoñ ġham-ḳhvār duniyā ho ga.ī

kyā samajhte ho yaqīñ kar legī tum kuchh bhī kaho

soch kar denā bayāñ hoshyār duniyā ho ga.ī

kyā sahāfī kyā muarriḳh kaise aalim kyā adiib

dekhte hī dekhte bāzār duniyā ho ga.ī

haar kar jis ne kiyā hai us se samjhautā 'farāz'

haañ usī ke vāste hamvār duniyā ho ga.ī

is qadar sachchai se bezar duniya ho gai

zad pe gardan hai miri, talwar duniya ho gai

us ke dil mein nim goli, shahd baaton mein rakhe

puchhte kya ho miyan! makkar duniya ho gai

be-hayai bewafai be-yaqini be-hisi

kaise kaise KHanjaron ki dhaar duniya ho gai

maslahat ne kis qadar tabdil us ko kar diya

ghair main hun in dinon gham-KHwar duniya ho gai

kya samajhte ho yaqin kar legi tum kuchh bhi kaho

soch kar dena bayan hoshyar duniya ho gai

kya sahafi kya muarriKH kaise aalim kya adib

dekhte hi dekhte bazar duniya ho gai

haar kar jis ne kiya hai us se samjhauta 'faraaz'

han usi ke waste hamwar duniya ho gai