is qadar uski mudaraat hai virane mein

is qadar us kī mudārāt hai vīrāne meñ

koī to baat hai āḳhir tire dīvāne meñ

faiz-e-sāqī se jo mahrūm haiñ mai-ḳhāne meñ

jaane kyā ham se ḳhatā ho ga.ī anjāne meñ

vaqt kī baat hai ab us ke taraste haiñ lab

''jitnī ham chhoḌ diyā karte the paimāne meñ''

maiñ ne maanā ki adū bhī tirā shaidā.ī hai

farq hotā hai fidā hone meñ mar jaane meñ

dilrubā.ī ke jise ham ne sikhā.e andāz

jān-e-mahfil hai vahī ġhair ke kāshāne meñ

har adā dil ke liye dashna-o-ḳhanjar hai magar

aur hī baat hai zālim tire sharmāne meñ

na tasallī na tashaffī na koī pyaar kī baat

tujh ko kyā miltā hai kāfir hameñ taḌpāne meñ

sāqiyā mai jo nahīñ baaqī to talchhaT hī sahī

Daal de nām-e-ḳhudā thoḌī sī paimāne meñ

merī jānib se tire dil meñ ġhubār aa hī gayā

āḳhirash aa hī gayā ġhair ke bhaḌkāne meñ

ishq kī aag sivā kis meñ hai ye kaun kahe

sham.a ke sīna-e-sozāñ meñ ki parvāne meñ

'ḳhār' hai jalva-e-asnām se dil ḳhuld-e-barīñ

yā parī-zādoñ kā majma.a hai parī-ḳhāne meñ

is qadar us ki mudaraat hai virane mein

koi to baat hai aaKHir tere diwane mein

faiz-e-saqi se jo mahrum hain mai-KHane mein

jaane kya hum se KHata ho gai anjaane mein

waqt ki baat hai ab us ke taraste hain lab

jitni hum chhoD diya karte the paimane mein

main ne mana ki adu bhi tera shaidai hai

farq hota hai fida hone mein mar jaane mein

dilrubai ke jise hum ne sikhae andaz

jaan-e-mahfil hai wahi ghair ke kashane mein

har ada dil ke liye dashna-o-KHanjar hai magar

aur hi baat hai zalim tere sharmane mein

na tasalli na tashaffi na koi pyar ki baat

tujh ko kya milta hai kafir hamein taDpane mein

saqiya mai jo nahin baqi to talchhaT hi sahi

Dal de nam-e-KHuda thoDi si paimane mein

meri jaanib se tere dil mein ghubar aa hi gaya

aaKHirash aa hi gaya ghair ke bhaDkane mein

ishq ki aag siwa kis mein hai ye kaun kahe

shama ke sina-e-sozan mein ki parwane mein

'KHar' hai jalwa-e-asnam se dil KHuld-e-barin

ya pari-zadon ka majma hai pari-KHane mein