is raat kisi aur qalam-rau mein kahin tha

is raat kisī aur qalam-rau meñ kahīñ thā

tum aa.e to maiñ apne badan hī meñ nahīñ thā

kyā bazm thī us bazm meñ kaun aa.e hue the

mahtāb bhī sūraj bhī sitāra bhī vahīñ thā

kuchh niiñd se bojhal thiiñ tire shahr kī āñkheñ

kuchh merī kahānī meñ bhī vo rabt nahīñ thā

kahte haiñ ki ruk sī ga.ī raftār-e-zamāna

jab sair-e-samāvāt meñ ik ḳhāk-nashīñ thā

ai kaash zarā der na tum raah badalte

do chaar qadam aur mirā shahr-e-hazīñ thā

aise to nahīñ auj pe aayā thā sitamgar

vo ḳhud bhī hasīñ us kā sitāra bhī hasīñ thā

maiñ ḳhāl-e-ruḳh-e-yār pe de detā samarqand

lekin vo ilāqa bhī mire paas nahīñ thā

is raat kisi aur qalam-rau mein kahin tha

tum aae to main apne badan hi mein nahin tha

kya bazm thi us bazm mein kaun aae hue the

mahtab bhi suraj bhi sitara bhi wahin tha

kuchh nind se bojhal thin tere shahr ki aankhen

kuchh meri kahani mein bhi wo rabt nahin tha

kahte hain ki ruk si gai raftar-e-zamana

jab sair-e-samawat mein ek KHak-nashin tha

ai kash zara der na tum rah badalte

do chaar qadam aur mera shahr-e-hazin tha

aise to nahin auj pe aaya tha sitamgar

wo KHud bhi hasin us ka sitara bhi hasin tha

main KHal-e-ruKH-e-yar pe de deta samarqand

lekin wo ilaqa bhi mere pas nahin tha