is sadi ka jab kabhi KHatm-e-safar dekhenge log

is sadī kā jab kabhī ḳhatm-e-safar dekheñge log

vaqt ke chehre pe ḳhāk-e-rahguzar dekheñge log

tuḳhm-rezī kar rahā huuñ maiñ isī ummīd par

phūlte phalte hue kal ye shajar dekheñge log

aql-e-insānī kī jis din intihā ho jā.egī

ḳhatm hote chāñd sūraj kā safar dekheñge log

kāñch kī dīvār patthar ke sutūñ lohe kī chhat

har jagah har shahr meñ aisā hī ghar dekheñge log

jur.at-e-parvāz ke anjām se vāqif huuñ maiñ

ḳhuun meñ Duubā huā ye bāl-o-par dekheñge log

kyā isī din ke liye māñgī thī phūloñ kī duā

shabnamī-mausam meñ bhī raqs-e-sharar dekheñge log

ḳhatm ham par haiñ shab-e-zindāñ kī saarī saḳhtiyāñ

zehn o dil āzād hogā vo sahar dekheñge log

anjuman ko faiz pahuñchā.egī sham-e-anjuman

kyā hasīñ hotī hai umr muḳhtasar dekheñge log

'ramz' maiñ apnī zabāñ se kuchh nahīñ batlā.ūñgā

kis taraf uThtī hai ye merī nazar dekheñge log

is sadi ka jab kabhi KHatm-e-safar dekhenge log

waqt ke chehre pe KHak-e-rahguzar dekhenge log

tuKHm-rezi kar raha hun main isi ummid par

phulte phalte hue kal ye shajar dekhenge log

aql-e-insani ki jis din intiha ho jaegi

KHatm hote chand suraj ka safar dekhenge log

kanch ki diwar patthar ke sutun lohe ki chhat

har jagah har shahr mein aisa hi ghar dekhenge log

jurat-e-parwaz ke anjam se waqif hun main

KHun mein Duba hua ye baal-o-par dekhenge log

kya isi din ke liye mangi thi phulon ki dua

shabnami-mausam mein bhi raqs-e-sharar dekhenge log

KHatm hum par hain shab-e-zindan ki sari saKHtiyan

zehn o dil aazad hoga wo sahar dekhenge log

anjuman ko faiz pahunchaegi sham-e-anjuman

kya hasin hoti hai umr muKHtasar dekhenge log

'ramz' main apni zaban se kuchh nahin batlaunga

kis taraf uThti hai ye meri nazar dekhenge log