is safai se meri baat ka pahlu kaTe

is safā.ī se mirī baat kā pahlū kaaTe

rasta ḳhushbū ke liye jis tarah ḳhushbū kaaTe

ilm hogā shab-e-hijrāñ kī tavālat kā tujhe

merī mānind jo ik raat kabhī tū kaaTe

ba.ad meñ aa.e sabhī mujh se baġhal-gīrī ko

mil ke ahbāb ne pahle mire baazū kaaTe

sīna-e-shab pe ziyāoñ kī darāḌeñ ubhrīñ

tīsha-e-azm se yuuñ raah ko jugnū kaaTe

zahr-e-māhaul se pur hai mire tan kā kaasa

kyoñ na mar jaa.e vahīñ mujh ko jo bichchhū kaaTe

un ke saa.e meñ raqīb aa ke mabādā baiTheñ

sab ke sab us ne shajar the jo lab-e-jū kaaTe

apne zaḳhmoñ ko ye sahlā.egī mahshar tak 'jān'

din tan-e-zīst meñ yuuñ ho ke tarāzū kaaTe

is safai se meri baat ka pahlu kaTe

rasta KHushbu ke liye jis tarah KHushbu kaTe

ilm hoga shab-e-hijran ki tawalat ka tujhe

meri manind jo ek raat kabhi tu kaTe

baad mein aae sabhi mujh se baghal-giri ko

mil ke ahbab ne pahle mere bazu kaTe

sina-e-shab pe ziyaon ki daraDen ubhrin

tisha-e-azm se yun rah ko jugnu kaTe

zahr-e-mahaul se pur hai mere tan ka kasa

kyon na mar jae wahin mujh ko jo bichchhu kaTe

un ke sae mein raqib aa ke mabaada baiThen

sab ke sab us ne shajar the jo lab-e-ju kaTe

apne zaKHmon ko ye sahlaegi mahshar tak 'jaan'

din tan-e-zist mein yun ho ke taraazu kaTe