اس سے غرض نہیں ہے کافر کہ پارسا ہو

اس سے غرض نہیں ہے کافر کہ پارسا ہو

بس اتنی آرزو ہے دل مرضئ خدا ہو

ہر شے سے ہو نمایاں حسن طلب کسی کا

ہر ذرہ میرے دل کا لبیک کہہ رہا ہو

پر لطف پھر نہ کیوں ہو یک رنگیٔ محبت

جو ان کی آرزو ہو میری وہی دعا ہو

پھر تیر آہ میرا لوٹا نہ آسماں سے

چشم فلک کا اے دل تارا نہ بن گیا ہو

شاخ تمنا میری پھولے پھلے جہاں میں

گلہائے آرزو سے دامن مرا بھرا ہو

نغمہ رہے نہ کوئی جب ساز آرزو میں

میرا دل شکستہ کیا خاک خوش نوا ہو