is se pahle is tarah ghar ko sajaya to nahin

is se pahle is tarah ghar ko sajāyā to nahīñ

dekhnā darvāze ke bāhar vo aayā to nahīñ

duur paas āñkhoñ meñ koī shahr bas aayā hai phir

ye kisī vīrānī-e-nau kā kināya to nahīñ

us jagah raushan hai shāḳh-e-dil pe jo ḳhurshīd sā

vo guzishta rut kā koī phūl-sāya to nahīñ

haañ bahut maġhmūm thā kal raat tere dhyān meñ

jaañ charāġh-e-yād ko lekin bujhāyā to nahīñ

haañ har ik ḳhush-chehra ko dil khol kar detā huuñ daad

chehra-e-sāda pa koī tujh sā bhāyā to nahīñ

tū bahut royā hai merī yaad meñ aur ro.egā

ai vafā-pesha magar maiñ muskurāyā to nahīñ

is se pahle is tarah ghar ko sajaya to nahin

dekhna darwaze ke bahar wo aaya to nahin

dur pas aankhon mein koi shahr bas aaya hai phir

ye kisi virani-e-nau ka kinaya to nahin

us jagah raushan hai shaKH-e-dil pe jo KHurshid sa

wo guzishta rut ka koi phul-saya to nahin

han bahut maghmum tha kal raat tere dhyan mein

jaan charagh-e-yaad ko lekin bujhaya to nahin

han har ek KHush-chehra ko dil khol kar deta hun dad

chehra-e-sada pa koi tujh sa bhaya to nahin

tu bahut roya hai meri yaad mein aur roega

ai wafa-pesha magar main muskuraya to nahin