is shahr mein nishana-e-qatil hami to hain

is shahr meñ nishāna-e-qātil hamī to haiñ

kuchh jābiroñ kī raah meñ haa.il hamī to haiñ

jo bechne chale haiñ matā-e-bahār ko

un dushmanoñ ke madd-e-muqābil hamī to haiñ

gul-kārī-e-chaman meñ hamārā lahū bhī hai

rañgīnī-e-bahār meñ shāmil hamī to haiñ

jo daulat-e-hunar ke talabgār haiñ abhī

ai rabb-e-harf-o-saut vasā.el hamī to haiñ

jo kho ga.e haiñ pech-o-ḳham-e-rahguzār meñ

un sab ke muntazir sar-e-manzil hamī to haiñ

ik umr se haiñ halqa-e-girdāb meñ ghire

nā-āshnā-e-qurbat-e-sāhil hamī to haiñ

ham hī se hai ye raunaq-e-bazm-e-hayāt bhī

is kārobār-e-vaqt kā hāsil hamī to haiñ

us ne atā kiyā hai ġham-e-do-jahāñ hameñ

us kī navāzishāt ke qābil hamī to haiñ

ham-rāhyān-e-jāda-e-duniyā se kyā gila

'shāhid' ḳhud apnī zaat se ġhāfil hamī to haiñ

is shahr mein nishana-e-qatil hami to hain

kuchh jabiron ki rah mein hail hami to hain

jo bechne chale hain mata-e-bahaar ko

un dushmanon ke madd-e-muqabil hami to hain

gul-kari-e-chaman mein hamara lahu bhi hai

rangini-e-bahaar mein shamil hami to hain

jo daulat-e-hunar ke talabgar hain abhi

ai rabb-e-harf-o-saut wasael hami to hain

jo kho gae hain pech-o-KHam-e-rahguzar mein

un sab ke muntazir sar-e-manzil hami to hain

ek umr se hain halqa-e-girdab mein ghire

na-ashna-e-qurbat-e-sahil hami to hain

hum hi se hai ye raunaq-e-bazm-e-hayat bhi

is karobar-e-waqt ka hasil hami to hain

us ne ata kiya hai gham-e-do-jahan hamein

us ki nawazishat ke qabil hami to hain

ham-rahyan-e-jada-e-duniya se kya gila

'shahid' KHud apni zat se ghafil hami to hain