is takalluf se na poshak-e-badan-gir mein aa

is takalluf se na poshāk-e-badan-gīr meñ aa

ḳhvāb kī tarah kabhī ḳhvāb kī ta.abīr meñ aa

maiñ bhī ai surḳhi-e-be-nām tujhe pahchānūñ

tū hinā hai ki lahū paikar-e-tasvīr meñ aa

is ke halqe meñ tag-o-tāz kī vus.at hai bahut

āhū-e-shahr mirī bāñhoñ kī zanjīr meñ aa

chāra-gar ḳhair se ḳhush-zauq hai ai merī ġhazal

kaam ab tū hī mire dard kī tash.hīr meñ aa

vo bhī āmāda bahut din se hai sunñe ke liye

ab to ai harf-e-talab ma.ariz-e-taqrīr meñ aa

ek rang āḳhirī manzar kī dhanak meñ kam hai

mauj-e-ḳhūñ uTh ke zarā arsa-e-shamshīr meñ aa

is takalluf se na poshak-e-badan-gir mein aa

KHwab ki tarah kabhi KHwab ki tabir mein aa

main bhi ai surKHi-e-be-nam tujhe pahchanun

tu hina hai ki lahu paikar-e-taswir mein aa

is ke halqe mein tag-o-taz ki wusat hai bahut

aahu-e-shahr meri banhon ki zanjir mein aa

chaara-gar KHair se KHush-zauq hai ai meri ghazal

kaam ab tu hi mere dard ki tashhir mein aa

wo bhi aamada bahut din se hai sunne ke liye

ab to ai harf-e-talab mariz-e-taqrir mein aa

ek rang aaKHiri manzar ki dhanak mein kam hai

mauj-e-KHun uTh ke zara arsa-e-shamshir mein aa