is takallum ki ada par koi kya baat kare

is takallum kī adā par koī kyā baat kare

hoñT chup hoñ to tirā rañg-e-hinā baat kare

dekh ham ḳhāk-nashīnoñ se zamāne kā sulūk

jaise sūkhe hue pattoñ se havā baat kare

mujh ko har faisla manzūr magar āḳhirī baar

vo mire sāmne aa kar tū zarā baat kare

ek pathrā.ī huī bhiiḌ se huuñ mahv-e-kalām

jaise ḳhāmosh mazāroñ se diyā baat kare

saare aalam se judā ho tirā ejāz-e-suḳhan

jis se tū baat kare us se ḳhudā baat kare

is takallum ki ada par koi kya baat kare

honT chup hon to tera rang-e-hina baat kare

dekh hum KHak-nashinon se zamane ka suluk

jaise sukhe hue patton se hawa baat kare

mujh ko har faisla manzur magar aaKHiri bar

wo mere samne aa kar tu zara baat kare

ek pathrai hui bhiD se hun mahw-e-kalam

jaise KHamosh mazaron se diya baat kare

sare aalam se juda ho tera ejaz-e-suKHan

jis se tu baat kare us se KHuda baat kare