is taraf aag ka dariya hai udhar khai hai

is taraf aag kā dariyā hai udhar khaa.ī hai

ham ne bhī paar utarne kī qasam khaa.ī hai

apne kamre se nikal kar zarā dekho to sahī

dhuup dīvār se āñgan meñ utar aa.ī hai

jin charāġhoñ kā tire naam se rishta hī nahīñ

un charāġhoñ kī zamāne meñ pazīrā.ī hai

raat kī shāḳh se laTke haiñ sitāroñ ke charāġh

ghar kī dahlīz pe baiThī huī tanhā.ī hai

aisā mausam hai ki be-barg-o-samar haiñ ashjār

kyoñ havā shor machāne ko chalī aa.ī hai

dhuup ke shahr meñ bādal ko tarasne vaalo

aaj bārish nahīñ hogī ye ḳhabar aa.ī hai

jis pe dīvār ke us paar kā manzar na khule

aisī bīnā.ī bhī kis kaam kī bīnā.ī hai

apne andar kā ye aalam bhī ajab aalam hai

bhiiḌ kī bhiiḌ hai tanhā.ī kī tanhā.ī hai

mujh pe ilzām hai āhista-ḳhirāmī kā 'matīn'

tez chaltā huuñ to ahbāb kī rusvā.ī hai

is taraf aag ka dariya hai udhar khai hai

hum ne bhi par utarne ki qasam khai hai

apne kamre se nikal kar zara dekho to sahi

dhup diwar se aangan mein utar aai hai

jin charaghon ka tere nam se rishta hi nahin

un charaghon ki zamane mein pazirai hai

raat ki shaKH se laTke hain sitaron ke charagh

ghar ki dahliz pe baiThi hui tanhai hai

aisa mausam hai ki be-barg-o-samar hain ashjar

kyon hawa shor machane ko chali aai hai

dhup ke shahr mein baadal ko tarasne walo

aaj barish nahin hogi ye KHabar aai hai

jis pe diwar ke us par ka manzar na khule

aisi binai bhi kis kaam ki binai hai

apne andar ka ye aalam bhi ajab aalam hai

bhiD ki bhiD hai tanhai ki tanhai hai

mujh pe ilzam hai aahista-KHirami ka 'matin'

tez chalta hun to ahbab ki ruswai hai