اس طرح بسر اپنی کاش زندگی ہوتی

اس طرح بسر اپنی کاش زندگی ہوتی

زندگی بجائے خود جان بے خودی ہوتی

حسن کی تجلی کا معترف ہوں میں لیکن

میرے غم کدہ میں بھی کاش روشنی ہوتی

میری ہی طرح نازک حسیات کے مالک

سچ بتا مرے غم سے کیا تجھے خوشی ہوتی

کم سے کم کسی حد تک دل کی آگ بجھ جاتی

کاش میری آنکھوں میں اس قدر نمی ہوتی

شوق اگر نہ بھر دیتا رنگ نقش الفت میں

حسن کی اداؤں میں کیا یہ دل کشی ہوتی

جو مری نگاہوں کی تاب لا نہیں سکتی

وہ نظر اگر اٹھتی جان زندگی ہوتی

آپ اگر نہ لے لیتے دامن حفاظت میں

شمع زندگی اپنی کب کی بجھ گئی ہوتی

درد کے فسانے میں اختصار لازم تھا

یعنی چند سانسوں میں شرح زندگی ہوتی

یا مجھے وہ خود سے بھی بے نیاز کر دیتے

یا حزیںؔ مرے بس میں میری زندگی ہوتی