is tarah basar apni kash zindagi hoti

is tarah basar apnī kaash zindagī hotī

zindagī bajā-e-ḳhud jān-e-be-ḳhudī hotī

husn kī tajallī kā mo'tarif huuñ maiñ lekin

mere ġham-kade meñ bhī kaash raushnī hotī

merī hī tarah nāzuk hissiyāt ke mālik

sach batā mire ġham se kyā tujhe ḳhushī hotī

kam se kam kisī had tak dil kī aag bujh jaatī

kaash merī āñkhoñ meñ is qadar namī hotī

shauq agar na bhar detā rang naqsh-e-ulfat meñ

husn kī adāoñ meñ kyā ye dilkashī hotī

jo mirī nigāhoñ kī taab lā nahīñ saktī

vo nazar agar uThtī jān-e-zindagī hotī

aap agar na le lete dāman-e-hifāzat meñ

sham’-e-zindagī apnī kab kī bujh ga.ī hotī

dard ke fasāne meñ iḳhtisār lāzim thā

yā'nī chand sāñsoñ meñ sharh-e-zindagī hotī

yā mujhe vo ḳhud se bhī be-niyāz kar dete

yā 'hazīñ' mire bas meñ merī zindagī hotī

is tarah basar apni kash zindagi hoti

zindagi baja-e-KHud jaan-e-be-KHudi hoti

husn ki tajalli ka mo'tarif hun main lekin

mere gham-kade mein bhi kash raushni hoti

meri hi tarah nazuk hissiyat ke malik

sach bata mere gham se kya tujhe KHushi hoti

kam se kam kisi had tak dil ki aag bujh jati

kash meri aankhon mein is qadar nami hoti

shauq agar na bhar deta rang naqsh-e-ulfat mein

husn ki adaon mein kya ye dilkashi hoti

jo meri nigahon ki tab la nahin sakti

wo nazar agar uThti jaan-e-zindagi hoti

aap agar na le lete daman-e-hifazat mein

sham’-e-zindagi apni kab ki bujh gai hoti

dard ke fasane mein iKHtisar lazim tha

ya'ni chand sanson mein sharh-e-zindagi hoti

ya mujhe wo KHud se bhi be-niyaz kar dete

ya 'hazin' mere bas mein meri zindagi hoti