اس طرح ہمیں کب تک زندگی بتانی ہے

اس طرح ہمیں کب تک زندگی بتانی ہے

تشنگی کا صحرا ہے چھاؤں ہے نہ پانی ہے

ہر نئی مصیبت پر ایسے مسکراتا ہوں

جیسے میری ہر غم سے دوستی پرانی ہے

حسرت محبت میں آرزوئے جاناں میں

جانے کتنے شہروں کی میں نے خاک چھانی ہے

آج میرے ساغر میں غم کا اک سمندر ہے

آج مجھ کو صدیوں کی تشنگی بجھانی ہے

اس حسین منظر کی کھینچ لے کوئی تصویر

آنسوؤں کی نہروں میں ان دنوں روانی ہے

اے نظرؔ محبت میں غم سے ہارنا کیسا

جس طرح بھی ممکن ہو زندگی بتانی ہے