is tarah hamein kab tak zindagi bitani hai

is tarah hameñ kab tak zindagī bitānī hai

tishnagī kā sahrā hai chhāñv hai na paanī hai

har na.ī musībat par aise muskurātā huuñ

jaise merī har ġham se dostī purānī hai

hasrat-e-mohabbat meñ ārzū-e-jānāñ meñ

jaane kitne shahroñ kī maiñ ne ḳhaak chhānī hai

aaj mere sāġhar meñ ġham kā ik samundar hai

aaj mujh ko sadiyoñ kī tishnagī bujhānī hai

is hasīn manzar kī khīñch le koī tasvīr

āñsuoñ kī nahroñ meñ in dinoñ ravānī hai

ai 'nazar' mohabbat meñ ġham se hārnā kaisā

jis tarah bhī mumkin ho zindagī bitānī hai

is tarah hamein kab tak zindagi bitani hai

tishnagi ka sahra hai chhanw hai na pani hai

har nai musibat par aise muskuraata hun

jaise meri har gham se dosti purani hai

hasrat-e-mohabbat mein aarzu-e-jaanan mein

jaane kitne shahron ki main ne KHak chhani hai

aaj mere saghar mein gham ka ek samundar hai

aaj mujh ko sadiyon ki tishnagi bujhani hai

is hasin manzar ki khinch le koi taswir

aansuon ki nahron mein in dinon rawani hai

ai 'nazar' mohabbat mein gham se haarna kaisa

jis tarah bhi mumkin ho zindagi bitani hai