is tarah ishq ka aazar na ji ko hoga

is tarah ishq kā āzār na jī ko hogā

jo mujhe dukh hai vo shāyad na kisī ko hogā

mastiyāñ baḌh ke mirī ḳhud hī balā.eñ leñgī

auj hāsil vo mirī bāda-kashī ko hogā

maiñ mohabbat ke masā.il ko samajh saktā huuñ

sāmne mere ye da.avā na kisī ko hogā

ishq kā gard-e-kasāfat se ta.alluq kyā hai

jis kā dil paak hai ye rog usī ko hogā

mire ash.ār meñ kyā kyā haiñ 'munavār' nukte

is kā andāza kisī mard-e-valī ko hogā

is tarah ishq ka aazar na ji ko hoga

jo mujhe dukh hai wo shayad na kisi ko hoga

mastiyan baDh ke meri KHud hi balaen lengi

auj hasil wo meri baada-kashi ko hoga

main mohabbat ke masail ko samajh sakta hun

samne mere ye dawa na kisi ko hoga

ishq ka gard-e-kasafat se talluq kya hai

jis ka dil pak hai ye rog usi ko hoga

mere ashaar mein kya kya hain 'munawar' nukte

is ka andaza kisi mard-e-wali ko hoga