is tarah kabhi randa-e-darbar nahin the

is tarah kabhī rāñda-e-darbār nahīñ the

rusvā the magar yuuñ sar-e-bāzār nahīñ the

sahrā meñ liye phirtī hai dīvāngī-e-shauq

kyā shahr meñ tere dar-o-dīvār nahīñ the

vo din ga.e jab manzil-e-jānāñ ke musāfir

rahrav the faqat qāfila-sālār nahīñ the

hai jur.at-e-guftār to phir sāmne aa kar

kah dījiye ham log vafādār nahīñ the

kyuuñ ham hī khaTakte rahe duniyā kī nazar meñ

dīvānoñ meñ ik ham hī tarah-dār nahīñ the

dete haiñ duā.eñ tirī duzdīda nazar ko

dīvāne kabhī itne to hushiyār nahīñ the

kyuuñ mohr-ba-lab kūcha-e-jānāñ se guzarte

insān the ham sāya-e-dīvār nahīñ the

vāraftagī-e-shauq batā tū hī ki ham se

ābād kabhī kūcha-o-bāzār nahīñ the

is tarah kabhi randa-e-darbar nahin the

ruswa the magar yun sar-e-bazar nahin the

sahra mein liye phirti hai diwangi-e-shauq

kya shahr mein tere dar-o-diwar nahin the

wo din gae jab manzil-e-jaanan ke musafir

rahraw the faqat qafila-salar nahin the

hai jurat-e-guftar to phir samne aa kar

kah dijiye hum log wafadar nahin the

kyun hum hi khaTakte rahe duniya ki nazar mein

diwanon mein ek hum hi tarah-dar nahin the

dete hain duaen teri duzdida nazar ko

diwane kabhi itne to hushiyar nahin the

kyun mohr-ba-lab kucha-e-jaanan se guzarte

insan the hum saya-e-diwar nahin the

waraftagi-e-shauq bata tu hi ki hum se

aabaad kabhi kucha-o-bazar nahin the