اس طرح کرب کی شدت کو چھپا رکھا ہے

اس طرح کرب کی شدت کو چھپا رکھا ہے

میں نے پلکوں پہ تبسم کو سجا رکھا ہے

وہ مرے گھر کی طرف لوٹ کے آئے گا کبھی

بس اسی آس پہ اک دیپ جلا رکھا ہے

میں اندھیروں سے بھلا خوف بھی کھاتا کیسے

میرے ماں باپ نے تو نام ضیاؔ رکھا ہے

اور کیا دوں میں تجھے اپنی محبت کا ثبوت

تیرے قدموں پہ زمانے کو جھکا رکھا ہے

ہاتھ رسماً ہی ملایا تھا کسی سے میں نے

آسماں تم نے مگر سر پہ اٹھا رکھا ہے

کھوئے کھوئے ہوئے رہتے ہیں ہمیشہ آخر

تم نے کیا حال ضیا زخمیؔ بنا رکھا ہے