is tarah ke lutf se koi kahan tak shad ho

is tarah ke lutf se koī kahāñ tak shaad ho

lutf ke parde meñ jab bedād hī bedād ho

aise jiine se koī kyā mutma.in kyā shaad ho

har-nafas jab āh-o-zārī har-nafas fariyād ho

merī barbādī kā qissa mere ġham kī dāstāñ

ai vafā-nā-āshnā shāyad tujhe kuchh yaad ho

bin tire mahsūs yuuñ kartā huuñ jaise zindagī

sar-basar mujh par koī ilzām be-buniyād ho

rafta-rafta miT rahe haiñ merī barbādī ke naqsh

o sitamgar phir koī taaza sitam ījād ho

is tarah suunī hai 'āsī' zindagī un ke baġhair

jis tarah koī makāñ muddat se ġhair-ābād ho

is tarah ke lutf se koi kahan tak shad ho

lutf ke parde mein jab bedad hi bedad ho

aise jine se koi kya mutmain kya shad ho

har-nafas jab aah-o-zari har-nafas fariyaad ho

meri barbaadi ka qissa mere gham ki dastan

ai wafa-na-ashna shayad tujhe kuchh yaad ho

bin tere mahsus yun karta hun jaise zindagi

sar-basar mujh par koi ilzam be-buniyaad ho

rafta-rafta miT rahe hain meri barbaadi ke naqsh

o sitamgar phir koi taza sitam ijad ho

is tarah suni hai 'asi' zindagi un ke baghair

jis tarah koi makan muddat se ghair-abaad ho