اس طرح کی گفتگو سے ہم نیا کیا پائیں گے

اس طرح کی گفتگو سے ہم نیا کیا پائیں گے

اک سوئی کی نوک پہ کتنے فرشتے آئیں گے

ہم تو سمجھے تھے کہ پانی جھوم کے برسائیں گے

کیا خبر تھی اب کے بادل آگ لے کر آئیں گے

اک نئی تاریخ لکھنے کی ضرورت ہے ہمیں

ہم یہ ماضی کے فسانے کب تلک دہرائیں گے

ان کی منشا ہی نہیں امن و اماں ہو دیش میں

یہ سیاسی لوگ ہیں بس رائتا پھیلائیں گے

جائیں گے اپنے مسائل لے کے کس کے سامنے

کام کرنے والے ہی جب کام کو اٹکائیں گے

یہ تو سوچا بھی نہ ہوگا بابائے آئین نے

عدل و آئینی ادارے اس طرح میمیائیں گے

بس یہی انجام ہونا ہے ہمارا عشق میں

یا تمہیں حاصل کریں گے یا کہ ہم مر جائیں گے