is tarah mah-ruKHon ko pasheman karenge hum

is tarah mah-ruḳhoñ ko pashemāñ kareñge ham

ab daaġh daaġh dil kā numāyāñ kareñge ham

ā.īna ban ke jā.eñge bazm-e-jamāl meñ

mahfil ke rū-ba-rū unheñ hairāñ kareñge ham

aa.e to vo bahār-e-dil-o-jāñ nigāh meñ

ik ik nafas ko rashk-e-gulistāñ kareñge ham

us but ko apne dil meñ basāne se peshtar

paimā.ish-e-harārat-e-īmāñ kareñge ham

mil jaa.e un kā naqsh-e-kaf-e-pā agar kahīñ

ik ik lakīr juzv-e-rag-e-jāñ kareñge ham

ehsān-e-vasl-e-yār bhī manzūr hai magar

āzār-e-hijr-e-yār ke armāñ kareñge ham

'aḳhgar' kisī kī yaad meñ lāzim hai ek jashn

ḳhūn-e-jigar se ḳhātir-e-mizgāñ kareñge ham

is tarah mah-ruKHon ko pasheman karenge hum

ab dagh dagh dil ka numayan karenge hum

aaina ban ke jaenge bazm-e-jamal mein

mahfil ke ru-ba-ru unhen hairan karenge hum

aae to wo bahaar-e-dil-o-jaan nigah mein

ek ek nafas ko rashk-e-gulistan karenge hum

us but ko apne dil mein basane se peshtar

paimaish-e-hararat-e-iman karenge hum

mil jae un ka naqsh-e-kaf-e-pa agar kahin

ek ek lakir juzw-e-rag-e-jaan karenge hum

ehsan-e-wasl-e-yar bhi manzur hai magar

aazar-e-hijr-e-yar ke arman karenge hum

'aKHgar' kisi ki yaad mein lazim hai ek jashn

KHun-e-jigar se KHatir-e-mizgan karenge hum