is tarah main use bhulata hun

is tarah maiñ use bhulātā huuñ

pattharoñ par likhā miTātā huuñ

taaki us zindagī ko Dar na lage

maut ke fā.ede ginātā huuñ

roz martā huuñ apne andar maiñ

roz ik laash maiñ uThātā huuñ

dard meñ kuchh kamī sī lagtī hai

zaḳhm par zaḳhm jab lagātā huuñ

saañs jaatī hai le ke duur mujhe

saañs aatī hai lauT aatā huuñ

vasl kā tajraba nahīñ hai mujhe

hijr kī shā.erī sunātā huuñ

raqs kartī haiñ gum-shuda yādeñ

aaj sab aa.ina bujhātā huuñ

jāntā huuñ ki dar khuleñge nahīñ

be-sabab chābiyāñ ghumātā huuñ

pahle kartā huuñ ḳhud use nārāz

aur phir der tak manātā huuñ

dhaḌkanoñ shor kam karo kuchh der

maiñ bas un ko bulā ke laatā huuñ

is tarah main use bhulata hun

pattharon par likha miTata hun

taki us zindagi ko Dar na lage

maut ke faede ginata hun

roz marta hun apne andar main

roz ek lash main uThata hun

dard mein kuchh kami si lagti hai

zaKHm par zaKHm jab lagata hun

sans jati hai le ke dur mujhe

sans aati hai lauT aata hun

wasl ka tajraba nahin hai mujhe

hijr ki shaeri sunata hun

raqs karti hain gum-shuda yaaden

aaj sab aaina bujhata hun

jaanta hun ki dar khulenge nahin

be-sabab chabiyan ghumata hun

pahle karta hun KHud use naraaz

aur phir der tak manata hun

dhaDkanon shor kam karo kuchh der

main bas un ko bula ke lata hun