is tarah masaib ka kar ke sadd-e-bab aae

is tarah masā.ib kā kar ke sadd-e-bāb aa.e

ḳhvāhishāt ko apnī ham kahīñ pe daab aa.e

ye mirā junūñ thā jo haar kar nahīñ baiThā

varna zindagānī meñ ġham to be-hisāb aa.e

ek sang-dil mujh par mā.il-e-karam hai aaj

hairatī huuñ kīkar par kis tarah gulāb aa.e

merī kāmyābī par jashn kyoñ manā.egā

merā naam sunte hī jis ko pech-o-tāb aa.e

aap kī mohabbat kā aaj ho gayā qaa.il

ek phuul ke badle sang be-hisāb aa.e

mushkileñ huiiñ āsāñ rāste hue dushvār

kaT chukī saroñ kī fasl ab to inqalāb aa.e

bā-kamāl the 'ambar' phir bhī ham rahe gumnām

be-hunar ke hisse meñ saikḌoñ ḳhitāb aa.e

is tarah masaib ka kar ke sadd-e-bab aae

KHwahishat ko apni hum kahin pe dab aae

ye mera junun tha jo haar kar nahin baiTha

warna zindagani mein gham to be-hisab aae

ek sang-dil mujh par mail-e-karam hai aaj

hairati hun kikar par kis tarah gulab aae

meri kaamyabi par jashn kyon manaega

mera nam sunte hi jis ko pech-o-tab aae

aap ki mohabbat ka aaj ho gaya qail

ek phul ke badle sang be-hisab aae

mushkilen huin aasan raste hue dushwar

kaT chuki saron ki fasl ab to inqalab aae

ba-kamal the 'ambar' phir bhi hum rahe gumnam

be-hunar ke hisse mein saikDon KHitab aae