is tarah mujhse muKHatib hai sadaqat meri

is tarah mujh se muḳhātib hai sadāqat merī

zaḳhm ehsās ko detī hai basārat merī

us ne miTTī ke khilaune kī tarah toḌ diyā

kyoñ ḳhamoshī ko na samjhā vo 'ibādat merī

maiñ jazīre kī tarah ghir ga.ī tūfānoñ meñ

bebasī le ga.ī āñkhoñ se basārat merī

jaane kab samjhegā koī mirī āñkhoñ kī zabāñ

jaane alfāz se kab hogī vazāhat merī

apne chehre ko bhī dekhūñ tire ā.īne meñ

terā mafhūm nazar aa.e 'ibārat merī

ruuh meñ phir tujhe mahsūs kiyā hai maiñ ne

phir tujhe DhūñDne niklī hai sadāqat merī

koī sūraj to mirī fikr meñ niklā hogā

aaj tak mujh ko jalātī hai tamāzat merī

ḳhaak ho kar bhī rahūñ terī guzargāhoñ meñ

faḳhr karnā bhī sikhā degī qanā'at merī

muntazir jis ke liye ruuh kā sannāTā rahā

usī āvāz ko tarsī hai samā'at merī

tere ehsās meñ Duubī huī ḳhushbū hai 'nasīm'

phuuT niklegī zamīñ se bhī sadāqat merī

is tarah mujh se muKHatib hai sadaqat meri

zaKHm ehsas ko deti hai basarat meri

us ne miTTi ke khilaune ki tarah toD diya

kyon KHamoshi ko na samjha wo 'ibaadat meri

main jazire ki tarah ghir gai tufanon mein

bebasi le gai aankhon se basarat meri

jaane kab samjhega koi meri aankhon ki zaban

jaane alfaz se kab hogi wazahat meri

apne chehre ko bhi dekhun tere aaine mein

tera mafhum nazar aae 'ibarat meri

ruh mein phir tujhe mahsus kiya hai main ne

phir tujhe DhunDne nikli hai sadaqat meri

koi suraj to meri fikr mein nikla hoga

aaj tak mujh ko jalati hai tamazat meri

KHak ho kar bhi rahun teri guzargahon mein

faKHr karna bhi sikha degi qana'at meri

muntazir jis ke liye ruh ka sannaTa raha

usi aawaz ko tarsi hai sama'at meri

tere ehsas mein Dubi hui KHushbu hai 'nasim'

phuT niklegi zamin se bhi sadaqat meri