is tarah se kuchh miTae dard-e-dil

is tarah se kuchh miTā.e dard-e-dil

maut kī sūrat dikhā.e dard-e-dil

ab nishān-e-dil bhī mil saktā nahīñ

dekhnī hai intihā-e-dard-e-dil

dil kī hālat ġhair hotī hai to ho

ham na māñgeñge davā-e-dard-e-dil

pūchhte kyā ho mire dil meñ hai kyā

kuchh nahīñ is meñ sivā-e-dard-e-dil

dard-e-dil kā ḳhaak vo jaane maza

jo nahīñ hai mubtalā-e-dard-e-dil

ḳhud masīhā bhī hai is se be-ḳhabar

bañdh ga.ī kaisī havā-e-dard-e-dil

ho ga.e 'be-zār' ham tasvīr-e-marg

thā yahī to mudda'ā-e-dard-e-dil

is tarah se kuchh miTae dard-e-dil

maut ki surat dikhae dard-e-dil

ab nishan-e-dil bhi mil sakta nahin

dekhni hai intiha-e-dard-e-dil

dil ki haalat ghair hoti hai to ho

hum na mangenge dawa-e-dard-e-dil

puchhte kya ho mere dil mein hai kya

kuchh nahin is mein siwa-e-dard-e-dil

dard-e-dil ka KHak wo jaane maza

jo nahin hai mubtala-e-dard-e-dil

KHud masiha bhi hai is se be-KHabar

bandh gai kaisi hawa-e-dard-e-dil

ho gae 'be-zar' hum taswir-e-marg

tha yahi to mudda'a-e-dard-e-dil