is tarah wo dhyan mera khinchta hai

is tarah vo dhyān merā khīñchtā hai

jis tarah paise ko paisa khīñchtā hai

maiñ irāda to nahīñ kartā safar kā

kyā kareñ kashtī ko dariyā khīñchtā hai

jis qadar ḳhush lag rahe haiñ haiñ nahīñ ham

ye to tū tasvīr baḌhiyā khīñchtā hai

pahle to bāhoñ meñ bhartā hai vo mujh ko

aur phir dhīme se parda khīñchtā hai

jo mo.azzin ban gayā thā tere dil kā

aaj vo mandir meñ qashqa khīñchtā hai

roktī hai be-safar logoñ ko dahlīz

rāhgīroñ ko tamāsha khīñchtā hai

sarhadeñ bantī bigaḌ jaatī haiñ 'harshit'

jab koī kāġhaz pe naqsha khīñchtā hai

is tarah wo dhyan mera khinchta hai

jis tarah paise ko paisa khinchta hai

main irada to nahin karta safar ka

kya karen kashti ko dariya khinchta hai

jis qadar KHush lag rahe hain hain nahin hum

ye to tu taswir baDhiya khinchta hai

pahle to bahon mein bharta hai wo mujh ko

aur phir dhime se parda khinchta hai

jo moazzin ban gaya tha tere dil ka

aaj wo mandir mein qashqa khinchta hai

rokti hai be-safar logon ko dahliz

rahgiron ko tamasha khinchta hai

sarhaden banti bigaD jati hain 'harshit'

jab koi kaghaz pe naqsha khinchta hai