is tarah zist basar ki koi pursan na hua

is tarah ziist basar kī koī pursāñ na huā

yuuñ maiñ duniyā se uThā dāġh-e-azīzāñ na huā

mustaqil vaz.a rahī kuchh ġham-e-daurāñ na huā

āñdhiyoñ meñ bhī ġhubār apnā pareshāñ na huā

vaz.a par harf na aa.ī diyā vahshat meñ bhī

lafz-o-ma.anī kī tarah maiñ kabhī uryāñ na huā

vaar kyā kyā na sahe teġh havādis kī magar

aise bashshāsh rahe zaḳhm bhī giryāñ na huā

bujh gayā dil kā kañval daaġh se jalte jalte

gul kisī shab ye charāġh-e-shab-e-hijrāñ na huā

sāmnā aise balāoñ kā rahā duniyā meñ

malak-ul-maut bhī aa.e to hirāsāñ na huā

eḌiyāñ maiñ ne ye ragḌīñ ki gaḌhe Daal diye

gorkan kā bhī maiñ sharminda-e-ehsāñ na huā

misl-e-nai nāla-kashī meñ mirī guzrī guzre

dil meñ nāsūr to ye hai koī pursāñ na huā

abrū jaatī agar be-asar aañsū bahte

shukr añgusht-numā panja-e-mizhgāñ na huā

ulfat abrū-e-sanam kī huī patthar kī lakīr

mahv-e-dil se ḳhat-e-qismat kisī unvāñ na huā

munharif kyuuñ ruḳh-e-mahbūb se hai ai vaa.iz

tū musalmān huā qā.il-e-qur.āñ na huā

dil se nā-chīz zamāne meñ koī chiiz nahīñ

mol kyā muft bhī jis kā koī ḳhvāhāñ na huā

ham bhī to dekhte kis tarah nikalte gir kar

chāh-e-yūsuf ye tirā chāh-e-zanaḳhdāñ na huā

kapḌe phāḌe se bhī nikle na harārat dil kī

rishta-e-sham.a koī tār-e-garebāñ na huā

naala karne ko bhī muñh chāhiye al-qais-e-hazīñ

koī zangūla-e-jammāza hudī-ḳhvāñ na huā

sufla-o-dūñ na kabhī raunaq-e-mahfil hoñge

jugnū din se kabhī aalam meñ charāġhāñ na huā

ai junūñ nikle na ik daaġh se hasrat dil kī

daaġh mujh ko hai ki tā.ūs-e-gulistāñ na huā

haa.e shañgarf hai likkhe ki lab-e-lālīñ hai

baat ye pūchhte yāqūt raqam-ḳhāñ na huā

koī laḌkā na dam-e-qaid huā dāman-gīr

koī patthar mujhe sañg-e-rah-e-zindāñ na huā

ai junūñ kuchh na milā ābla-pā.ī kā mazā

gokharo paañv meñ kyuuñ ḳhār-e-muġhīlāñ na huā

kyā faromāya baḌhegā use himmat kyā hai

'bahr' dariyā kā kabhī chaah meñ tuġhyāñ na huā

is tarah zist basar ki koi pursan na hua

yun main duniya se uTha dagh-e-azizan na hua

mustaqil waza rahi kuchh gham-e-dauran na hua

aandhiyon mein bhi ghubar apna pareshan na hua

waza par harf na aai diya wahshat mein bhi

lafz-o-mani ki tarah main kabhi uryan na hua

war kya kya na sahe tegh hawadis ki magar

aise bashshash rahe zaKHm bhi giryan na hua

bujh gaya dil ka kanwal dagh se jalte jalte

gul kisi shab ye charagh-e-shab-e-hijran na hua

samna aise balaon ka raha duniya mein

malak-ul-maut bhi aae to hirasan na hua

eDiyan main ne ye ragDin ki gaDhe Dal diye

gorkan ka bhi main sharminda-e-ehsan na hua

misl-e-nai nala-kashi mein meri guzri guzre

dil mein nasur to ye hai koi pursan na hua

abru jati agar be-asar aansu bahte

shukr angusht-numa panja-e-mizhgan na hua

ulfat abru-e-sanam ki hui patthar ki lakir

mahw-e-dil se KHat-e-qismat kisi unwan na hua

munharif kyun ruKH-e-mahbub se hai ai waiz

tu musalman hua qail-e-quran na hua

dil se na-chiz zamane mein koi chiz nahin

mol kya muft bhi jis ka koi KHwahan na hua

hum bhi to dekhte kis tarah nikalte gir kar

chah-e-yusuf ye tera chah-e-zanaKHdan na hua

kapDe phaDe se bhi nikle na hararat dil ki

rishta-e-shama koi tar-e-gareban na hua

nala karne ko bhi munh chahiye al-qais-e-hazin

koi zangula-e-jammaza hudi-KHwan na hua

sufla-o-dun na kabhi raunaq-e-mahfil honge

jugnu din se kabhi aalam mein charaghan na hua

ai junun nikle na ek dagh se hasrat dil ki

dagh mujh ko hai ki taus-e-gulistan na hua

hae shangarf hai likkhe ki lab-e-lalin hai

baat ye puchhte yaqut raqam-KHan na hua

koi laDka na dam-e-qaid hua daman-gir

koi patthar mujhe sang-e-rah-e-zindan na hua

ai junun kuchh na mila aabla-pai ka maza

gokharo panw mein kyun KHar-e-mughilan na hua

kya faromaya baDhega use himmat kya hai

'bahr' dariya ka kabhi chah mein tughyan na hua