is tawaqqo mein shab-o-roz guzara jae

is tavaqqo meñ shab-o-roz guzārā jaa.e

chaḌhtī sāñsoñ kā kahīñ bojh utārā jaa.e

ham sabhī log haiñ paanī kī tahoñ meñ baiThe

mauj tai kartī hai kab kis ko ubhārā jaa.e

apne atrāf ke sannāTe ko bharne ke liye

aa kisī dard ke pahlū ko nikhārā jaa.e

kūcha-e-ishq meñ zaḳhmoñ ke na.e taur bhī haiñ

sar zarūrī nahīñ patthar pe hī maarā jaa.e

hijr ke ma.anoñ meñ ik ma.anī maiñ batlā.ūñ tumheñ

ya.anī dariyā se alag ho ke kinārā jaa.e

niiñd hai ḳhvāb hai aur chāñd sitāre maujūd

raat kā vaqt hai kis kis ko pukārā jaa.e

muḳhtalif rang haiñ is rang kī chāhat meñ asiir

us ke qadmoñ ke ta.āqub meñ nazārā jaa.e

is tawaqqo mein shab-o-roz guzara jae

chaDhti sanson ka kahin bojh utara jae

hum sabhi log hain pani ki tahon mein baiThe

mauj tai karti hai kab kis ko ubhaara jae

apne atraf ke sannaTe ko bharne ke liye

aa kisi dard ke pahlu ko nikhaara jae

kucha-e-ishq mein zaKHmon ke nae taur bhi hain

sar zaruri nahin patthar pe hi mara jae

hijr ke manon mein ek mani main batlaun tumhein

yani dariya se alag ho ke kinara jae

nind hai KHwab hai aur chand sitare maujud

raat ka waqt hai kis kis ko pukara jae

muKHtalif rang hain is rang ki chahat mein asir

us ke qadmon ke taaqub mein nazara jae