is tawaqqo pe ki dekhun kabhi aate jate

is tavaqqo pe ki dekhūñ kabhī aate jaate

ghis ga.e paañv rah-e-dost meñ jaate jaate

fikr-e-dozaḳh meñ hameñ raf.a-ma.āsī kī paḌī

aag par dāman-e-tar ko haiñ sukhāte jaate

ġhair kā zor chale un pe aur un kā mujh par

kahte haiñ muñh se ho kyuuñ raal uḌāte jaate

ġhair ko le ke girānī kī na Thahrī hotī

apne darvāze se mujh ko na uThāte jaate

kyuuñ nishāñ chhoḌ ga.e tez-ravān-e-rah-e-ishq

ka.aba-o-but-kada ko chāhiye Dhāte jaate

aag se sabza kabhī aur kabhī naḳhl se aag

haiñ har ik rañg meñ nairañg dikhāte jaate

sabza ban jā.eñge āḳhir ko chaman ke sab sarv

sharm se terī zamīñ meñ haiñ samāte jaate

mujh se bigḌe hue un ko huī muddat 'nāzim'

biich vaale haiñ abhī baat banāte jaate

is tawaqqo pe ki dekhun kabhi aate jate

ghis gae panw rah-e-dost mein jate jate

fikr-e-dozaKH mein hamein rafa-maasi ki paDi

aag par daman-e-tar ko hain sukhate jate

ghair ka zor chale un pe aur un ka mujh par

kahte hain munh se ho kyun ral uDate jate

ghair ko le ke girani ki na Thahri hoti

apne darwaze se mujh ko na uThate jate

kyun nishan chhoD gae tez-rawan-e-rah-e-ishq

kaba-o-but-kada ko chahiye Dhate jate

aag se sabza kabhi aur kabhi naKHl se aag

hain har ek rang mein nairang dikhate jate

sabza ban jaenge aaKHir ko chaman ke sab sarw

sharm se teri zamin mein hain samate jate

mujh se bigDe hue un ko hui muddat 'nazim'

bich wale hain abhi baat banate jate