is waste ki dil hai musalsal azab mein

is vāste ki dil hai musalsal azaab meñ

ham pī rahe haiñ zahr milā kar sharāb meñ

mad.hosh is qadar huuñ shab-e-māhtāb meñ

Duube hue haiñ jaib-o-garebāñ sharāb meñ

ai kaash un ko phir tirī āvāz mil sake

naġhme taḌap rahe haiñ jo mere rabāb meñ

vo shaḳhs thā kabhī jo rag-e-jāñ se bhī qarīb

ab vo kisī ḳhayāl meñ hai aur na ḳhvāb meñ

kuchh aql-o-hosh-o-fahm-o-firāsat meñ kho ga.e

kuchh dost ḳhud ko DhūñD rahe haiñ sharāb meñ

kyoñ mujh pe mehrbāñ hai ġham-e-zīst in dinoñ

kyā aisī baat hai mire hāl-e-ḳharāb meñ

ik puḳhta-tab.a rind-e-ḳharābāt hai 'kañval'

vaa.iz jo chāhe aib nikāleñ sharāb meñ

is waste ki dil hai musalsal azab mein

hum pi rahe hain zahr mila kar sharab mein

madhosh is qadar hun shab-e-mahtab mein

Dube hue hain jaib-o-gareban sharab mein

ai kash un ko phir teri aawaz mil sake

naghme taDap rahe hain jo mere rabab mein

wo shaKHs tha kabhi jo rag-e-jaan se bhi qarib

ab wo kisi KHayal mein hai aur na KHwab mein

kuchh aql-o-hosh-o-fahm-o-firasat mein kho gae

kuchh dost KHud ko DhunD rahe hain sharab mein

kyon mujh pe mehrban hai gham-e-zist in dinon

kya aisi baat hai mere haal-e-KHarab mein

ek puKHta-taba rind-e-KHarabaat hai 'kanwal'

waiz jo chahe aib nikalen sharab mein